Os estatutos

ESTATUTOS DA ASOCIACIÓN A RENTE DO CHAN-PLADEVER

CAPÍTULO I: DA ASOCIACIÓN EN XERAL

Artigo 1º.- 1. Esta Asociación é una entidade sen ánimo de lucro que se rexerá polos presentes Estatutos e pola Lei orgánica 1/2002, do 22 de marzo, reguladora do Dereito de Asociacións e pola demáis lexislación existente en materia de Asociacións que lle sexa aplicábel.

A asociación ten a seguinte denominación “ASOCIACIÓN A RENTE DO CHAN-PLADEVER”

Artigo 2º.- O domicilio principal e permanente da asociación radicará na localidade de Ponte Caldelas, Lugar de Gradín 17, C.P. 36820, correos electrónicos: arentedochan@gmail.com e pladever@gmail.com.

Artigo 3º.- A asociación, en función dos seus fins e do emprazamento do seu domicilio social, exercerá fundamentalmente as súas actividades no ámbito territorial da comunidade autónoma de Galicia.

Artigo 4º.- A asociación constitúese por tempo indefinido e só se disolverá, conforme a estes estatutos, pola vontade dos asociados expresada en Asemblea Xeral Extraordinaria ou polas causas previstas na lexislación vixente.

Artigo 5º.- A Asociación poderá asociarse, participar en redes de colaboración ou crear plataformas con outras asociacións e institución que teñan principios semellantes para a consecución dos fins propostos nestes estatutos.

Artigo 6º.

1. Son fins principais da asociación:
   1. A protección, conservación, recuperación e posta en valor dos espazos naturais e paisaxísticos e do seu patrimonio cultural
   2. A protección das persoas e os seres vivos
   3. A educación ambiental que fomente o respecto e a valoración da contorna
   4. A promoción de prácticas de bo uso e conservación dos recursos naturais
   5. Impulsar a participación cidadá na xestión e conservación do territorio
   6. Asegurar a protección xurídica do territorio para o interese social común e das xeracións futuras de acordo cos propietarios e usuarios do territorio.
   7. A colaboración coas administracións e os órganos institucionais en temas medioambientais.
   8. A promoción dun desenvolvemento sostible da súa contorna.
   9. A promoción da investigación medioambiental e a promoción do consumo responsable

2. Para levar a cabo os seus fins, poderá a asociación levar a cabo as seguintes actividades:
   1. Mediación e facilitación de acordos de uso común en zonas de especial interese
   2. Custodia do territorio
   3. Organización e participación en charlas informativas e formativas, conferencias, coloquios, cursos, intercambios de experiencias de interese para as intencións da asociación.
   4. Edición e publicación de boletíns, folletos informativos ou traballos científicos na forma que libremente se acorde dentro dos límites legais e regulamentarios.
   5. Organización de campamentos, itinerarios ecolóxicos.
   6. Organización de traballos de voluntariado e animación ao voluntariado.
   7. Investigación educativa e medioambiental.
   8. Promoción, execución e colaboración activa en iniciativas encamiñadas á conservación, defensa e valoración da Natureza, do Medio Ambiente e o fomento da sostenibilidade.
   9. Organización de campañas públicas en defensa da natureza.
   10. Entablar toda clase de accións legais que teñan relación cos seus fins.
   11. Procurar a colaboración con entidades e institucións de carácter público ou privado, tanto galegas como estatais, incluíndo tamén na súa esfera de participación aos organismos internacionais constituídos con idénticos ou semellantes fins.
   12. A realización de estudos científicos, traballos de campo e de industrias e inventarios ecolóxicos, contando a tal fin co asesoramento e contratación de persoal preciso para tales fins.
   13. Iniciar todas aquelas accións que permitan desenvolver as iniciativas que teman relación cos seus fins.
       

1 A denominación debería incluí-lo vocábulo “Asociación” seguido necesariamente do tipo de asociación (recreativa, cultural, veciños, etc.), a finalidade principal e doutro nome co que desexe complementa-la denominación.

² No caso de utilizar un local social doutra titularidade terá que acreditarse autorización de uso correspondente e debidamente asinado.

CAPÍTULO II: DOS ASOCIADOS

Artigo 7º. Poderán ser integrantes da asociación todas aquelas persoas físicas con plena capacidade de obrar e as persoas xurídicas tralo acordo do seu órgano competente, que non teñan débedas pendentes coa asociación.

2.-Os acordos de admisión de asociados e asociadas tomaraos a Xunta Directiva, unha vez recibida a petición por escrito da persoa que desexa ser admitida, declarando a súa identidade e dando a súa conformidade aos principios sustentados pola Asociación.

Artigo 8º.- Dentro da asociación poderán existi-las seguintes clases de asociados:

1. Colaboradoras/es, aquelas persoas que habitualmente colaboran activamente coa asociación.
2. Protectores/as, aquelas persoas interesadas pero que non querer ou non poden realizar traballos colaborativos
3. Xuvenís, aquelas persoas menores de 18 anos que participen na asociación, que estarán integradas na sección xuvenil, no seu caso.

1. Adquirirán a condición de socias/os colaboradoras/es cantas persoas o desexen e soliciten por escrito e ratifique a Xunta Directiva.

A participación das/os socias/os colaboradoras/es consiste no seu dereito de asistencia ás actividades da Asociación, ás Asembleas Xerais con expresión do seu voto e ofrecendo ou denunciando cuestións en relación cos fins da Asociación. Son electoras/es e elixíbeis para todos os cargos da Asociación. Teñen dereito a ser informados acerca da composición dos órganos de goberno e representación da Asociación, do seu estado de contas e do desenvolvemento da súa actividade.

As/os socias/os colaboradoras/es cotizarán unha cota anual, na contía que estipule para cada momento a Xunta Directiva e ratifique a Asemblea Xeral, e que poderá ser diferente para as persoas físicas ou xurídicas así como para as persoas empregadas e desempregadas. Cumprirán os acordos da Asemblea Xeral e o contido dos Estatutos.

2. Adquirirán a condición de socias/os protectores/as cantas persoas o desexen e soliciten por escrito e ratifique a Xunta Directiva.

Terán dereito a participaren en todos os actos da Asociación pero non serán electoras/es nin elixíbeis.

As/os socias/os protectoras/es cotizarán unha cuota anual, na contía que estipule para cada momento a Xunta Directiva e ratifique a Asemblea Xeral.

3.- Adquirirán a condición de socias/os Xuvenís cantas personas o desexen, considerándose deste xeito as/os menores non emancipados de máis de 14 anos co consentimento, documentalmente acreditado, das persoas que deban supli-la súa capacidade e que o soliciten por escrito e ratifique a Xunta Directiva. Terán dereito a participaren en todos os actos da Asociación pero non serán electoras/es nin elixíbeis.

As/os socias/os xuvenís non cotizarán cota ningunha.

Artigo 9º. 1.-A condición de asociado pérdese:

1. Por vontade propia.
2. Por falta de pago de 2 cotas.
3. Por incumprimento das súas obrigas ou a realización de accións que prexudiquen gravemente ós intereses da Asociación, previo expediente disciplinario, con audiencia do interesado.
4. Por falecemento da persoa física ou extinción da persoa xurídica.

2.-A expulsión de asociados e asociadas nos supostos dos apartados b) e c) do parágrafo anterior, será acordada pola Xunta Directiva, logo da audiencia do interesado. O acordo de expulsión deberá ser ratificado pola Asemblea Xeral Extraordinaria e contra a súa resolución poderase recorrer ante a xurisdición ordinaria.

Artigo 10º.- Os asociados e asociadas teñen os seguintes dereitos:

1. Participar nas actividades da asociación e nos órganos de goberno e representación, exerce-lo dereito de voto, así como asistir á Asemblea xeral, de acordo cos estatutos.
2. Ser informado da composición dos órganos de goberno e representación da asociación, do seu estado de contas e do desenvolvemento da súa actividade.
3. Ser oído con carácter previo á adopción de medidas disciplinarias contra el e ser informado dos feitos que dean lugar ás ditas medidas, debendo motivarse o acordo que, no seu caso, impoña a sanción.
4. Impugna-los acordos dos órganos da asociación que estime contrarios á lei ou ós estatutos.

Os asociados e asociadas protectoras/es e xuvenís non intervirán na dirección da asociación nin nos órganos de representación dela pero si terán o dereito a intervir na Asamblea Xeral con independencia de que teñan ou non dereito a voto.

Artigo 11º.- Son obrigas dos asociados e asociadas:

1. Comparti-las finalidades da asociación e colaborar para a súa consecución.
2. Paga-las cotas que se establezan.
3. Desempeña-los cargos para os que foron elixidos.
4. Acatar e cumpri-los acordos validamente adoptados polos órganos de goberno e representación da asociación.
5. Acata-lo contido dos estatutos.
6. Ter unha boa conduta individual e cívica.
   

CAPÍTULO III: DOS ÓRGANOS DA ASOCIACIÓN

Artigo 12º.- A dirección e administración da asociación serán exercidas pola Xunta Directiva e a Asamblea Xeral

1. Tamén se poderán constituir Grupos ou Comisións de Traballo que, dependentes de Xunta Directiva, implican a aquelas/es asociadas/os que desexen formar parte de un de eles.
   

Artigo 13º. 1.– O presidente da asociación será designado pola Asemblea Xeral entre os asociados e o seu mandato durará 1 ano. Será asistido nas súas funcións por un secretario. En casos de vacante, ausencia ou enfermidade, o Presidente substituido polo Vicepresidente.

2.- O presidente terá as seguintes atribucións:

1. Representa-la asociación perante calquera organismo público ou privado.
2. Convocar e presidi-las sesións que celebre a Xunta Directiva; presidi-las sesións da Asemblea Xeral; dirixi-las deliberacións dunha e outra, e decidir con voto de calidade, no caso de empate.
3. Executa-los acordos adoptados pola Xunta Directiva e a Asemblea Xeral.
4. Ordena-los pagamentos acordados validamente.
5. Asina-las actas, certificados, pagamentos e outros documentos da asociación xunto co secretario ou membro da Xunta Directiva a quen lle corresponda a elaboración do documento de que se trate.
   

Artigo 14º. 1.- A Xunta Directiva estará formada polo presidente da asociación, o vicepresidente, un secretario, un tesoureiro e catro vocais.

2.- Os cargos que compoñen a Xunta Directiva serán desempeñados de forma gratuíta, sen prexuízo do dereito a ser reembolsados dos gastos debidamente xustificados en que poidan incorrer por actuacións relacionadas coa asociación.

As persoas elixidas para estes cargos deberán carecer de interese económico nos resultados da actividade levada a cabo pola asociación.

3.- A Asemblea Xeral será a competente para elixi-los cargos da Xunta Directiva. A súa duración será por un período de 1ano, aínda que poden ser obxecto de reelección indefinidamente.

4.- Os cargos cesarán na súa función por:

1. facelemento da persoa física ou extinción da persoa xurídica.
2. renuncia voluntaria.
3. transcurso do prazo para o que foron elixidos.
4. acordo de cesamento de toda a Xunta Directiva adoptado por 2/3 dos asociados reunidos en Asemblea Xeral extraordinaria convocada para tal efecto.

A renuncia e o transcurso do prazo non dan lugar ó cesamento automático, senón que se deberá facer un efectivo traspaso de poderes con entrega de documentación e posta ó día do sucesor.

As vacantes que se puideran producir durante o mandato de calquera dos membros da Xunta Directiva, serán cubertas provisoriamente entre os ditos membros ata a elección definitiva pola Asemblea Xeral. En calquera caso, a Xunta Directiva debe estar integrada como mínimo por 3 persoas, que exercerán as funcións de presidente, secretario e tesoureiro.

Artigo 15º.- A Xunta Directiva terá as seguintes atribucións:

1. Programar e dirixi-las actividades asociativas.
2. Leva-la xestión administrativa e económica da asociación.
3. Someter á aprobación da Asemblea Xeral o orzamento anual de ingresos e gastos, así como o estado de contas do ano anterior.
4. Convocar e fixa-la data da Asemblea Xeral.
5. Propoñerlle á Asemblea Xeral a fixación de cotas ordinarias e extraordinarias para os asociados.
6. Designa-las comisións de traballo ou seccións que se estimen oportunas para o bo funcionamento da asociación.
7. Ditar normas interiores de organización e exercer cantas funcións non estean expresamente asignadas á Asemblea Xeral.
8. Resolver sobre as solicitudes de ingreso de novos asociados.
9. Propoñe-lo plan de actividades da asociación á Asemblea Xeral para a súa aprobación, impulsando e dirixindo as súas tarefas.
10. Resolve-los procedementos disciplinarios que se instrúan.
11. Aquelas que non veñan atribuídas expresamente á outro órgano da asociación.
    

Artigo 16º. 1.- A Xunta Directiva será convocada polo presidente, a iniciativa propia ou a petición de calquera dos seus compoñentes.

2.- Para que os acordos da Xunta Directiva sexan válidos, deberán ser adoptados pola maioría de votos dos asistentes, sendo necesaria a concorrencia, polo menos, da metade máis un dos seus membros e, en todo caso, do presidente ou vicepresidente e o secretario ou persoa que o substitúa.

O secretario ou, no seu defecto, o vocal que o substitúa, levantará acta das sesións, que se transcribirá ó libro de actas.

Artigo 17º.- Os membros da Xunta Directiva presidirán as comisións que a propia Xunta acorde constituír, co fin de delegar nelas a preparación de determinados actos ou actividades, ou de acadar delas as informacións necesarias. Formarán parte das ditas comisións o número de asociados que acorde a Xunta Directiva, a proposta dos seus respectivos presidentes.

Artigo 18º.- A Asemblea Xeral de asociados e asociadas é o órgano de expresión da vontade da asociación e estará formada por tódolos integrantes desta. O presidente e o secretario da asemblea serán o presidente e o secretario da Xunta Directiva.

Artigo 19º.- A Asemblea Xeral reunirase con carácter ordinario como mínimo unha vez ó ano, e con carácter extraordinario cantas veces o acorde a Xunta Directiva, ou o soliciten o 10% dos socios. Neste último caso realizarase por medio de escrito dirixido ó presidente, autorizado coas sinaturas dos solicitantes, no que se expoña o motivo da convocatoria e a orde do día.

Artigo 20º.- A Asemblea Xeral Ordinaria reunirase necesariamente no período que vai desde o mes de xaneiro ata o de xuño Tanto a Asemblea Ordinaria como a Extraordinaria serán convocadas con 15 días de antelación polo/a presidente/a da Xunta Directiva.

A notificación farase nos locais da asociación para as asembleas ordinarias e telefónicamente ou mediante correo electrónico aos asociados para as asembleas extraordinarias.

Artigo 21º.- Serán competencias da Asemblea Xeral Ordinaria:

1. Aproba-lo plan de actividades.
2. Examinar e aproba-las contas e balances do exercicio anterior.

3. Aproba-los presupostos de ingresos e gastos para cada exercicio.
4. Exame e aprobación das cotas.
   

Artigo 22º.- Serán competencias da Asemblea Xeral Extraordinaria:

1. Modifica-los estatutos da asociación.
2. Elixir e cesa-los integrantes da Xunta Directiva.
3. Aproba-la federación con outras asociacións.
4. Autoriza-lo alleamento, gravame ou hipoteca de bens sociais.
5. Acorda-la disolución da asociación.
6. Designa-los/as liquidadores/as.
7. Ratifica-la expulsión de asociados e asociadas a proposta da Xunta Directiva.
8. Solicita-la declaración de utilidade pública da asociación.
9. Aproba-lo regulamento de réxime interno da asociación.
10. As que sendo de competencia da asemblea ordinaria, por razóns de urxencia ou necesidade, non poidan agarda-la súa convocatoria, sen grave prexuízo para a asociación.
11. Tódalas non conferidas expresamente á Asemblea Xeral Ordinaria ou a Xunta Directiva.
    

Artigo 23º. A Asemblea Xeral quedará validamente constituída sempre que concorran a metade máis un dos asociados na primeira convocatoria ou transcorrida media hora en segunda convocatoria, con calquera número de asistentes, pero, en todo caso, coa presenza do presidente ou vicepresidente e o secretario ou persoa que o substitúa.

Artigo 24º.- Os acordos adoptados deberán selo polo voto afirmativo da maioría simple dos asistentes ou representados, excepto os relativos ós apartados do 1 ó 7 do artigo 21º, que requirirán maioría de dous terzos. A continuación levaranse os acordos ó libro de actas e asinarao o/a presidente/a, o/a secretario/a da Asemblea. A acta deberá ser lida na seguinte sesión celebrada pola Asemblea Xeral e aprobada pola maioría dos membros presentes.

Artigo 25º.- Os acordos adoptados conforme ós preceptos anteriores obrigarán a tódolos/as asociados/as, incluso ós/ás non asistentes.

As sesións abriranse cando así o determine o presidente. Seguidamente procederase por parte do secretario á lectura da acta da asemblea anterior que deberá ser aprobada.

Posteriormente, o secretario procederá a presenta-la orde do día. Cada punto será informado polo membro da Xunta Directiva que lle corresponda, procedéndose ó debate e a aprobación dos correspondentes acordos nos termos contidos nestes estatutos, segundo a materia de que se trate.

Artigo 26º.- Os acordos que vaian contra estes estatutos ou infrinxan os fins da asociación poderán ser recorridos ante a a Asemblea Xeral, sen prexuizo de presentar o correspondente recurso ante a xurisdición ordinaria.

Artigo 27º.- 1. O secretario recibirá e tramitará as solicitudes de ingreso, levará o ficheiro e o libro rexistro de asociados e terá ó seu cargo a dirección dos traballos administrativos da entidade. Correspóndelle, así mesmo, notifica-las convocatorias, custodia-las actas e expedir certificacións destas co visto e prace do presidente. O secretario tamén levará o inventario dos bens da asociación nun libro establecido para este efecto.

2. Nos casos de ausencia, vacante ou enfermidade do secretario, o presidente designará entre os vocais a un que desenvolva esta función.

Artigo 28º.- 1. O tesoureiro recadará e custodiará os fondos pertencentes á asociación, dará cumprimento ás ordes de pagamento que expida o presidente, levará a contabilidade da asociación, tomará razón e levará conta dos ingresos e dos gastos asociativos, elaborará o borrador de orzamentos da asociación así como as contas de resultados e balances.

2. O tesoureiro ten a obriga de proceder ó peche do exercicio orzamentario antes do 15 de decembro, co fin de que as contas estean a disposición dos membros da asociación nos quince días anteriores á celebración da asemblea ordinaria.

Artigo 29º.- Os vocais terán as seguintes atribucións:

1. Realizar programas e propostas na súa área de actuación.
2. Desempeña-los traballos que lle sexan encomendados pola Xunta Directiva.

Artigo 30º.- Os grupos de traballo terán as seguintes atribucións:

1. Estimular o intercambio de información e canalizar as preocupacións, demandas e aspiracións dos asociados
2. Fomentar a colaboración

3. Abordar proxectos de interese compartido
4. Establecer fórmulas flexibles de traballo en rede.
   

CAPÍTULO IV: RÉXIME ECONÓMICO

Artigo 31º.- A asociación no momento de inicia-las súas actividades dispón dun patrimonio material de 160€ (cento sesenta euros) . O peche do exercicio económico coincidirá co do ano natural.

Artigo 32º.- A asociación funcionará en réxime de presuposto anual, con partidas diferenciadas de ingresos e gastos. O borrador de presuposto será elaborado polo tesoureiro da asociación, que deberá telo preparado antes do un de xaneiro de cada ano, a fin de que poida ser aprobado na Asemblea Xeral Ordinaria.

Artigo 33º.- A asociación manterase dos seguintes recursos:

1. As cotas periódicas dos/as asociados/as.
2. As cotas extraordinarias que propoña a Xunta Directiva e sexan aprobadas pola asemblea.
3. As doazóns ou subvencións que poidan conceder órganos públicos, entidades privadas ou particulares.
4. Os ingresos que se poidan recibir polo desenvolvemento das actividades da asociación.
5. Calquera outro ingreso admitido pola normativa vixente para actividades non lucrativas.

Artigo 34º.- A Asemblea Xeral Ordinaria, a proposta da Xunta Directiva, aprobará tanto as cotas ordinarias como as extraordinarias que non serán reintegrables en ningún caso. O recadado dedicarase a atende-las necesidades da asociación.

Artigo 35º.- Anualmente, con referencia ó ultimo día do exercicio económico de cada ano, elaboraranse as contas, que se formalizarán nunha memoria, que será posta a disposición dos/as asociados/as, durante un prazo non inferior a 15 días ó sinalado para a celebración da Asemblea Xeral Ordinaria, que deberá aprobalas ou censuralas.

Artigo 36º.- Para a disposición de fondos das contas que a asociación ten nas entidades bancarias será necesaria a sinatura conxunta do presidente e do tesoureiro.

Artigo 37º.-Os beneficios que se obteñan por calquera concepto destinaranse exclusivamente ó cumprimento dos fins da Asociación, sen que se poidan repartir entre os asociados nin outras persoas físicas ou xurídicas con interese lucrativo.

CAPÍTULO V: DO REGULAMENTO DE RÉXIME INTERNO

Artigo 38º.- O regulamento de réxime interno, no seu caso, desenvolverá aquelas materias non contempladas directamente nestes estatutos, como o procedemento de elección dos membros da Xunta Directiva e o procedemento disciplinario, e non pode ir en ningún caso en contra do estipulado neles. En todo caso, o funcionamento interno da asociación estará sometido ó ordenamento xurisdicional civil.

CAPÍTULO VI: MODIFICACIÓN DE ESTATUTOS E DISOLUCIÓN DA ASOCIACIÓN

Artigo 39º.- Os ditos estatutos só poderán ser modificados por acordo da Asemblea Xeral Extraordinaria convocada para tal efecto, adoptado polas 2/3 partes dos asociados. A proposta de convocatoria deberá ir acompañada do texto das modificacións propostas.

Artigo 40º.- A asociación disolverase voluntariamente por acordo dos asociados adoptado polas 2/3 partes dos asistentes á Asemblea Xeral Extraordinaria convocada para tal efecto.

Artigo 41º.- Acordada a disolución, a Asemblea Xeral Extraordinaria designará tres asociados/as liquidadores, que xunto o/a presidente e o/a tesoureiro/a, procederán para efectua-la liquidación dos bens, pagando débedas, cobrando créditos e fixando o haber líquido resultante.

Artigo 42º.- O haber resultante, unha vez efectuada a liquidación, doarase a outra asociación non lucrativa e inscrita na comunidade autónoma que teña iguais ou similares fins que os desta asociación.

O xustificante da doazón será presentado no Rexistro de Asociacións correspondente para proceder á inscrición da disolución da asociación.